Të Reja

U zhvillua në Universitetin Mesdhetar të Shqipërisë, konferenca  shkencore e studentëve, e para e këtyre përmasave në UMSH. Mbi 35 studentë të Fakultetit të Drejtësisë dhe Shkencave humane, prezantuan punimet e tyre shkencore mbi tematika të caktuara aktuale.  Qëllimi i kësaj konference,  ishte nxitja e   kreativitetit, inovacionit dhe kërkimit shkencor mes studentëve të UMSH. Rektori i Universitetit Mesdhetar të Shqipërisë, e cilësoi këtë konferencë  një gur themeli  me besimin e plotë se në të ardhmen aktivitete të tilla do të kthehen në traditë për studentët e UMSH-së. “Dua të theksoj faktin se duke parë punimet shkencore të studentëve, duket qartë se gama e tematikave është sa e gjerë aq edhe aktuale, problematikë kombëtare po kaq dhe ndërkombëtare për çështje nga më të rëndësishmet në shkencat jurdike, sociale, poltike dhe marrëdhënie ndërkombëtare. Angazhimi i studentëve mbi këto çështje madhore, e bën edhe më të madh vlerësimin për të mos qenë formalë por me qasje sa më shumë praktike dhe zgjidhje të ofruara”, u shpreh rektori Civici. Dekani i Fakultetit të Drejtësisë dhe Shkencave Humane Ksenofon Kristafi,  shprehu falenderime të veçanta për studentët dhe stafin akademik të kësaj konference. “Të gjitha punimet shkencore që do të prezantohen këtu janë rezultat i përkushtimit, vullnetit dhe përpjekjeve të palodhura disa mujore të studentëve tanë. Ata kanë punuar me pasion dhe dëshirë për të zbuluar zgjidhje inovative për sfidat që na rrethojnë”, u shpreh Dekani i Fakultetit të Drejtësisë dhe Shkencave Humane, Ksenofon Kristafi. Zv Rektorja, Nevila Rama theksoi se kjo konferencë lidhet edhe 9 majin ditën e Europës, duke e cilësuar si një organizim shumë të rëndësishëm të Universitetit Mesdhetar. Redi Shehu, përfaqësues i ALUMNI të Universitetit Mesdhetar, si ish student vlerësoi konferencën duke theksuar se inciativa të tilla forcojnë rolin e studentëve brenda një institucioni të arsimit të lartë. Ai shprehu gjithashtu vlerësimet për stafin akademik që është gjithnjë në krahj të studentëve në UMSH. E pranishme në panel ishte edhe Mimoza Halimi, Anëtare e Bordit të Punës, e cila gjithashtu përgëzoi studentët për pumimet e tyre, duke theksuar se punime të tilla shkencore janë vlerë e shtuar për të ardhmen e këtyre studentëve. Konferenca  bëri të mundur krijimin e  një mjedisi ku studentët shprehin ide të reja,  diskutojnë sfidat e mëdha të botës së sotme dhe  gjejnë mënyra për t'i adresuar ato, çka mbetet një nga prioritetet e përditshme të Universitetit Mesdhetar.