Studimet

Universiteti Mesdhetar i Shqipërisë, në kuadër të përkushtimit për rritjen e cilësisë së mësimnxënies dhe për të lehtësuar aksesin në programet e studimit që ofrohen në gjuhë të huaj, shpall hapjen e kurseve përgatitore për gjuhët e huaja për vitin akademik 2025–2026. Kurset do të zhvillohen për gjuhën angleze, gjermane, francize, italiane dhe atë arabe. Kohëzgjatja e tyre është tre muaj dhe do të zhvillohen në raundin e parë gjatë muajve korrik, gusht dhe shtator 2025, për të vijuar të organizohen në vazhdimësi në formë ciklike përgjatë gjithë vitit akademik 2025/2026.

Qëllimi i këtyre kurseve është:

• pregatitja e kandidat studentëve të cilët do të aplikojnë për regjistrim në programe studimi të cilat kanë si kusht njohjen e gjuhës së huaj në një nivel të caktuar në përputhje me përcaktimet e akteve nënligjore në fuqi;
• pregatitja e studentëve që synojnë regjistrimin në programet që ofrohen në një gjuhë të huaj brenda UMSH;
• mbështetja e studentëve që planifikojnë të ndjekin studimet jashtë vendit;
• aftësimi për përdorimin dhe kuptimin e literaturës bashkëkohore në gjuhë të huaj;

Kurset do të organizohen në nivele të ndryshme (B1, B2, C1), në përputhje me standardet e përcaktuara në Kuadrin e Përbashkët Evropian të Referencës për Gjuhët (CEFR). Organizimi i testimeve për vlerësimin e njohurive gjuhësore do të kryhet nga strukturat e përcaktuara në aktet rregullatore dhe do të kenë një kalendar zyrtar të koordinuar nga të dy palët.

Për më shumë informacion mbi regjistrimet, datat e fillimit dhe dokumentacionin e nevojshëm, ju lutemi kontaktoni Sekretarinë Mësimore të UMSH.