Studimet

Autoriteti i Mbikëqyrjes Financiare ka njohur me Urdhër Nr. 1689/1 Prot. Dt. 14.10.2025, aktivitetet e edukimit në vazhdim të organizuara nga Universiteti Mesdhetar i Shqipërisë për trajnimin e ndërmjetësve në sigurime, kategori agjentë për klasat jetë dhe jo-jetë, sipas Rregullores nr. 198, datë 29.12.2020 “Për kualifikimin profesional dhe edukimin në vazhdim”. Ky trajnim do të zhvillohet me ekspertë lektorë nga anëtarët e stafit akademik të Universitetit Mesdhetar të Shqipërisë, përfshirë anëtarët me përvojë në finance, administrim dhe menaxhim, si dhe trajnerë të ftuar ku janë angazhuar disa nga specialistët më të përgatitur dhe me përvojë në fushën e sigurimeve në vendin tonë.

Programi ka për qëllim të ofrojë njohuri të avancuara mbi produktet dhe procedurat e sigurimeve, standardet profesionale, ligjshmërinë dhe etikën në sektorin e sigurimeve, duke synuar zhvillimin profesional të qëndrueshëm të pjesëmarrësve. Pjesëmarrësit përfitojnë aftësi praktike dhe teorike të nevojshme për menaxhimin e situatave komplekse dhe për ofrimin e shërbimeve të sigurimeve jetë dhe jo-jetë me cilësi të lartë, rritjen e kompetencave profesionale dhe mundësinë për të aplikuar praktika të mira nga ekspertë të fushës së sigurimeve.

Universiteti Mesdhetar i Shqipërisë e zhvillon këtë trajnim të edukimit në vazhdim me mbështetjen dhe nën monitorimin e Autoritetit të Mbikqyrjes Financiare për të siguruar zbatimin e standardeve dhe kritereve rregullatore, duke garantuar që trajnimi i ndërmjetësve në sigurime të jetë në përputhje me praktikat më të mira profesionale dhe kërkesat ligjore të mbikëqyrjes financiare.