Studimet

Ky trajnim profesional përgatit ekspertë të kualifikuar në fushën e menaxhimit dhe shkrimit të projekteve, duke ofruar njohuri të thelluara teorike dhe praktike mbi ciklin e plotë të projektit - nga ideimi dhe planifikimi, deri te implementimi, monitorimi dhe vlerësimi i tij. Programi përfshin 40 orë mësimore dhe synon të zhvillojë aftësitë profesionale për hartimin e projekteve të suksesshme në përputhje me standardet kombëtare dhe ndërkombëtare të menaxhimit të projekteve. Gjatë trajnimit, pjesëmarrësit njihen me konceptet bazë të menaxhimit të projektit, përfshirë

• analizën e nevojave,
• hartimin e objektivave SMART,
• ndërtimin e Logical Framework,
• planifikimin e aktiviteteve dhe burimeve,
• hartimin e buxhetit, si dhe menaxhimin e riskut.

Një vëmendje e veçantë i kushtohet hartimit të projekteve për financime vendore dhe ndërkombëtare, përfshirë fondet e Bashkimit Evropian, organizatat ndërkombëtare dhe donatorët publikë e privatë. Trajnimi mbulon gjithashtu menaxhimin financiar të projekteve, përgatitjen e raporteve teknike dhe financiare, menaxhimin e kontratave, komunikimin me partnerët dhe autoritetet financuese, si dhe përdorimin e mjeteve dixhitale për menaxhimin dhe monitorimin e progresit të projektit. Në trajnim përfshihen ushtrime praktike, punë në grupe dhe analiza të rasteve konkrete të projekteve të realizuara në sektorin publik dhe privat. Në fund të programit, pjesëmarrësit zhvillojnë një projekt final, ku zbatojnë njohuritë e fituara në një propozim konkret.

Trajnimi ndihmon në zhvillimin e aftësive vendimmarrëse, strategjike dhe bashkëpunuese, si dhe në ngritjen e kompetencave për të punuar si menaxher projekti, koordinator, hartues propozimesh, specialist financimi apo konsulent për zhvillimin e projekteve. Në përfundim të trajnimit zhvillohet testimi përkatës referuar moduleve të zhvilluara, dhe pjesëmarrësit pajisen me certifikim të njohur nga Agjencia Kombëtare e Arsimit, Formimit Profesional dhe Kualifikimeve në Republikën e Shqipërisë.