Të Reja

Forumi Diplomatik Shqiptar startoi sot në Universitetin Mesdhetar. I konceptuar si një tryezë debati  për çështjet diplomatike, për çështjet e sigurisë  paqes dhe çështjet e integrimit të Shqipërisë dhe Ballkanit Perëndimor  në Bashkimin Europian, ky forum do të ketë të ftuar personalitete të lartë të këtyre fushave. “E nisim sot këtë Forum me të ftuar Ambasadorin e Austrisë në Shqipëri, jo për shkak të rendit alfabetik, por për një  arsye më të rëndësishme. E startuam kështu sepse Austria ky vend i jashtëzakonshëm ka qenë gjithnjë mbështetës i politikës së jashtme të Shqipërisë, si dhe avokatja më e mirë në  procesin të integrimit të saj dhe për këtë ne i jemi shumë mirënjohës”, u shpreh  Prof. Ass.Dr Arben Cici, Drejtues i Forumit Diplomatik Shqiptar. Në vijim të këtij prezantimi  i ftuari i parë, Ambasadori i Austrisë Sh.T.Z, Christian Steiner, duke vlerësuar inisiativën e  ndërmarrë nga Universiteti Mesdhetar i Shqipërisë,mbajti për studentët një leksion të hapur me temë “Roli i Austrisë në Bashkimin Europian”. Ai shpjegoi historinë e anëtarësimit të Austrisë ndër të parat shtete në këtë Union dhe u ndal  te roli mbështetës që Austria ka për politikën e zgjerimit të BE-së dhe integrimin e Ballkanit Perëndimor. Në këtë rrugëtim të gjatë, pjesë e së cilit është edhe Shqipëria, mbështetja e Austrisë mbetet e palëkundur në çdo hap  dhe veçanërisht në plotësimin e kushteve të nevojshme  deri në antarësimin e plotë.