Ndërkombëtarizimi

Qendra Abdulaziz Saud Albabtain për Paqen e Drejtë në Universitetin Mesdhetar të Shqipërisë, organizoi një aktivitet të veçantë rastin e Ditës Botërore të Diversitetit Kulturor për Dialog dhe Zhvillim të UNESCO-s (21 maj). Kjo është hera e parë e organizimit të ditës së kulturës arabe në UMSH.

Në këtë kuadër, e ftuar e veçantë ishte Ambasadorja e Shtetit të Palestinës H. E. Hana Shawa, e cila mbajti edhe një leksion të hapur mbi historinë e Palestinës, kremtimit për herë të parë të 75-vjetorit të Nakba-s në Selinë e OKB-së në New York dhe rëndësinë e vendosjes së paqes së drejtë në atë vend dhe në të gjithë rajonin e Mesdheut.
Ambasadorja Shawa cilësoi rolin e kulturës dhe të shkëmbimeve kulturore dhe universitare mes kombeve si një instrument të rëndësishëm për vendosjen e urave dhe lidhjeve të shëndosha mes popujve për arritjen e paqes së drejtë dhe afatgjatë.
Ambasadorja Shawa u prit në takim, në qendrën Abdulaziz Saud Albabtain për Paqen e Drejtë në UMSH, nga Rektori Profesor Adrian Civici, nga Drejtori i Katedrës, Profesor Arben Cici dhe nga anëtare e bordit, Profesore Elona Shahini.

Në hollin e Universitetit, u ekspozuan vëshje dhe punime tradicionale të Palestinës si dhe gatime të shijshme të përgatitura për këtë rast nga Ambasada e Shteti të Palestinës në Shqipëri.

Kjo përvojë e jashtëzakonshme do të kthehet në traditën e qendrës Abdulaziz Saud Albabtain për Paqen e Drejtë në UMSH, për të festuar ditën e kulturës dhe gjuhës arabe në këtë ditë të rëndësishme botërore, për të promovuar dhe mbrojtur diversitetin kulturor, për të nxitur të rinjtë të kuptojnë më tej se kulturat dhe qytetërimet mund të kontribuojnë në paqen e drejtë dhe zhvillimin e qendrueshëm në nivel lokal, rajonal dhe global.