Të Reja

Gjatë datave 29-30 Maj u zhvillua seanca hapëse (Kick off Meeting) e projektit ‘A cross regional predictive models for youth policy shaping - Youth Observers’. Ky projekt financohet nga Agjencia Europiane e Arsimit dhe Kulturës EACEA.  Qendra Mesdheu është koordinatore e projektit ku partnerë të tjerë janë organizatat EURELATIONS GEIE, ITALI, Qendra për Studime Krahasuese dhe Ndërkomëtare CCIS, Shqipëri, CCM Maqedoni e Veriut, Instituti për Politika Zhvillimore, Kosovë, Qendra Shkencë dhe Inovacion për Zhvillim, SCIDEV, Shqipëri.  

Në ditën e parë, pas prezantimit të përgjithshëm të projektit dhe të partnerëve, përfaqësues të organizatave rinore në Shqipëri dhe rajon, të rinj aktivistë, përfaqësues të organizatave të komuniteteve të margjinalizuara, përfaqësues të politikbërjes në lidhje me rininë në nivel lokal, diskutuan dhe sollën këndvështrimet e tyre në lidhje me sfidat më të cilat komuniteti rinor përballet në kontekstin politik, ekonomik dhe social të rajonit, gjithashtu u theksua rëndësia që projekte të tilla kanë në lidhje me angazhimin e politik të të rinjve dhe me krijimin e hapësirave sociale brenda të cilave zëri i rinisë do të dëgjohet. Gjatë ditës së dytë organizatat partnere diskutuan cështjet teknike që lidhen me implementimin e projektit.

Nëpërmjet këtij projekti synohet të nxitet dialogu në lidhje me politikbërjen, bashkëpunimin dhe shkëmbimin e praktikave më të mira duke propozuar një model të ri për angazhimin e të rinjve në Shqipëri, Maqedoninë e Veriut, Kosovë dhe Itali. Duke krijuar grupe mbikëqyrëse (Y-O), projekti do të fuqizojë të rinjtë që të kontribuojnë në analizën e politikave, lidershipin dhe angazhimin politik. Objektivat strategjike të projektit janë krijimi i grupeve të mbikqyrjes (Y-O) në katër vende, duke rritur aftësitë e tyre në analizën e politikave si dhe  promovimi i bashkëpunimit dhe dialogut ndër-rajonal.

Duke targetuar të rinjtë e moshës 18-29 vjeç nga Shqipëria, Kosova, Maqedonia e Veriut dhe Italia, projekti do të përzgjedhë 75 pjesëmarrës (15 për çdo vend) përmes një thirrjeje të hapur, duke siguruar përfaqësim nga komunitetet e margjinalizuara dhe grupe të ndryshme duke përfshirë akademinë, shoqërinë civile, median, biznesin, forumet politike rinore, punëtorët e rinj dhe ata me më pak mundësi.