Të Reja

Studentët e rinj të Universitetit Mesdhetar të Shqipërisë nisën ditën e parë të këtij viti akademik. Në të 4 fakultetet e UMSH, mirëpritja për ta ishte organizuar me leksionet e hapura nga drejtuesit, duke informuar studentët për kurrikulat mësimore, mundësitë, programet Erasmus plus nga të cilat ata përfitojnë dhe të gjitha intershipet e praktikat profesionale që ofron për ta Universiteti Mesdhetar Shqipërisë.

E ftuar speciale për Fakultetin e Shkencave Ekonomike, ishte Zv. Ministrja e Ekonomisë, Kulturës dhe Inovacionit, Olta Manjani. Zv. Ministrja, inkurajoi studentët të ndjekin pasionet e tyre, të mos ndalin edukimin, por mbi të gjitha të fokusohen në edukimin praktik, pasi tregu i punës sot kërkon studentë të aftë dhe konkurues.

Presidenti i Universitetit Mesdhetar, Akademik Prof. Dr. Anastas Angjeli më herët në fjalën e tij të mirëseardhjes për studentët, vuri theksin te prioriteti që Universiteti Mesdhetar ka prej vitesh, për të edukuar një brez të ri profesionitësh të cilët, pas diplomimit, t’i kenë dyert e hapura për zhvillimin e karrierës së tyre.