Të Reja

Universiteti Mesdhetar i Shqipërisë po merr pjesë në Asamblenë e Përgjithshme të Anëtarëve të UNIMED, e cila mbahet në Universitetin Aydin në Stamboll, Turqi. Si një anëtar dhe kontribues në këtë rrjet partneriteti prestigjioz, Universiteti Mesdhetar i Shqipërisë, kryesohej nga Presidenti i UMSh, Akademik Prof. Dr. Anastas Angjeli. Pjesëtarë të delegacionit ishin Zëvendës Rektore Prof. Asoc. Nevila Rama dhe Prorektori për Marrëdhëniet me Jashtë, Prof. Asoc. Arben Cici.
Bashkimi i Universiteteve të Mesdheut (UNIMED) është një rrjet akademik që përfshin grupimin më të madh të universitete nga vendet e Mesdheut. Ai promovon bashkëpunimin ndërkombëtar në fushat e arsimit dhe kërkimit shkencor, duke lehtësuar dhe forcuar raportet mes institucioneve akademike të vendeve anëtare të Bashkëpunimit Mesdhetar. UNIMED synon të nxisë mobilitetin e studentëve dhe stafit akademik, si dhe të lehtësojë shkëmbimin e njohurive dhe praktikave më të mira mes universiteteve pjesëmarrëse.

Ky takim ofron një platformë të shkëlqyer për të diskutuar projektet në fusha të ndryshme të bashkëpunimit ndërkombëtar akademik të institucioneve të arsimit të lartë dhe për të rritur e zgjeruar partneritin në përballimin e sfidave të përbashkëta aktuale të zhvillimit.

Në kuadër të bashkëpunimit në rrjetin UNIMED, edhe studentët kanë mundësinë të angazhohen në projekte ndërdisiplinore që promovojnë shkëmbimin kulturor dhe akademik mes vendeve mesdhetare. Këto projekte përfshijnë kërkimin në fusha si zhvillimi i qëndrueshëm, teknologjia, shëndetësia dhe trashëgimia kulturore, duke u mundësuar studentëve të ndajnë njohuri me kolegë nga universitete të ndryshme të rajonit, si dhe u ofron atyre një përvojë të çmuar ndërkulturore duke rritur perspektivat e tyre për karrierë në një treg global gjithnjë e më të integruar.