Të Reja

Presidenti i Universitetit Mesdhetar të Shqipërisë, Akademik Prof. Dr. Anastas Angjeli, mirëpriti një delegacion rumun të përbërë nga Sh.T.Z. Octavian Șerban, Ambasador i Rumanisë në Shqipëri; Z. Cristian Cutaș, Këshilltar i Ambasadës së Rumanisë në Shqipëri dhe drejtues i zyrës për Promovimin Tregtar dhe Ekonomik pranë kësaj ambasade; Prof. Dr. Costin Lianu, përfaqësues i Universitetit “Spiru Haret” në Bukuresht, Rumani; Prof. Dr. Irina Rădulescu, përfaqësuese e Universitetit Petroleum Gaz në Ploiești, Rumani; dhe z. Florian Ionescu, profesor dhe biznesmen. Gjatë takimit u diskutua për rëndësinë e marrëveshjeve dhe bashkëpunimeve akademike në rritjen cilësore të arsimit në Shqipëri, si dhe për mundësinë që Shqipëria të përfitojë nga përvoja e Rumanisë në proceset e saj para-aderimit në BE dhe ta përdorë atë në favor të zhvillimit të saj. Akademik Prof. Dr. Angjeli, duke falenderuar të pranishmit, theksoi gadishmërinë dhe përkushtimin e Universitetit Mesdhetar për krijimin dhe zbatimin e projekteve dypalëshe dhe shumëpalëshe. Ai shprehu gjithashtu synimin për konkretizimin e mëtejshëm të bashkëpunimeve përmes projekteve të përbashkëta, si dhe publikimeve akademike dhe shkencore me partnerët rumunë. Nga ana tjetër, z. Ambasador Octavian Șerban shprehu edhe një herë gadishmërinë për të qënë një urë lidhëse mes institucioneve akademike dhe shkencore të Rumanisë dhe Shqipërisë, duke vlerësuar këto marrëveshje si një hap të rëndësishëm drejt forcimit të lidhjeve të ngushta historike dhe kulturore midis dy popujve. Marrëveshjet e reja të nënshkruara dëshmojnë angazhimin e Universitetit Mesdhetar për përmirësimin e cilësisë së sistemit akademik dhe për pjesëmarrjen aktive në projekte lokale dhe ndërkombëtare me rëndësi të madhe. Këto marrëveshje përfshijnë bashkëpunime akademike dhe shkencore multidimensionale, si dhe krijimin e një qendre Digital & Innovation Hub brenda Universitetit Mesdhetar. Takimi u përmbyll me ceremoninë e nënshkrimit të marrëveshjeve nga Rektori i Universitetit Mesdhetar, Prof. Dr. Adrian Civici, dhe nga përfaqësuesit e universiteteve rumune.