Të Reja

Fakulteti i Drejtësisë dhe Shkencave Humane në bashkëpunim me Fakultetin e Informatikës, Fakultetin e Shkencave Ekonomike dhe Fakultetin e Shkencave Mjekësore organizon Konferencën e III-të Shkencore Studentore me temë “Inteligjenca artificiale dhe shoqëria” 15 maj 2025 Tiranë, Shqipëri

THIRRJE PËR PUNIME

Fakulteti i Drejtësisë dhe Shkencave Humane i Universitetit Mesdhetar të Shqipërisë ka kënaqësinë t’ju njoftojë organizimin e Konferencës së III-të Shkencore Studentore në Shkencat Juridike dhe Sociale. Ky event synon të krijojë një traditë të pjesëmarrjes së studentëve të nivelit Bachelor dhe Master në një proces të thellimit të punës së tyre kërkimore shkencore si dhe të shërbejë si një platformë që do t’iu mundësojë studentëve prezantimin e punës së tyre, shkëmbimin e mendimit kritik dhe angazhimin në një praktikë dialoguese me studentë të të gjitha nënfushave të studimeve juridike dhe sociale.

Konferenca synon të bashkojë në një tryezë debati studentët e të gjitha degëve dhe programeve të studimit të ofruara nga fakultetet dhe departamentet e Universitetit Mesdhetar të Shqipërisë si dhe studentë nga Universitete të tjera në vend dhe rajon për shkëmbimin e ideve dhe zhvillimin e punës së tyre kërkimore shkencore në lidhje me të gjitha aspektet e fushave ndërdisiplinare si studimeve në fushën e së drejtës, shkencave politike, marrëdhënieve ndërkombëtare, studimeve rajonale, studimeve antropologjike, studimeve psikologjike, studimeve të komunikimit, studimeve të fushës së edukimit, studimeve të fushës ekonomike, informatike, mjekësore.

Konferenca do të shërbejë për të gjithë pjesëmarrësit si një platformë për ndërlidhje, shkëmbim idesh dhe ballafaqim të punës së tyre kërkimore e cila është në fazat e para, me një komunitet akademik të specializuar. Konferenca nxit debatin për zhvillimet aktuale, ide, qasje dhe teori të reja, shqetësime dhe sfida në fushën e drejtësisë, studimeve sociale, studimeve në fushën informatike, ekonomike dhe mjekësore.

 

Abstrakti dhe Punimi:

Të gjithë të interesuarit, janë të lutur të dërgojnë abstraktet e punimeve, që duhet të përmbajë: Emrin e autorit/rëve, institucionin, Fakultetin, programin e studimit, vitin e studimit, adresën elektronike, (200-250 fjalë, Times New Roman, 12, single spaced) deri në datën 18 prill. Materialet do të dërgohen në adresën [email protected]

Teksti i plotë i punimit duhet të përmbajë 5000 - 7000 fjalë, i shkruar në Times New Roman, size 12, singled spaced dhe të përmbajë: Emrin e autorit/rëve, institucionin, adresën elektronike, Abstraktin, Fjalët kyçe, Hyrjen, Pjesën kryesore, Përfundimet dhe Bibliografinë. Afati përfundimtar i dërgimit të tekstit të plotë të artikullit është data 10 qershor 2025.

Abstraktet e punimeve të përzgjedhur nga Komiteti Shkencor, do të botohen në Proceedings të Konferencës që do të jetë në format elektronik. Të gjithë pjesëmarrësit do të marrin një kopje elektronike të Proceedings të Konferencës

Punimet më të mira të përzgjedhura nga Komiteti Shkencor, do të kenë mundësinë të botohen në një numër special të Revistës Shkencore të Fakultetit të Drejtësisë dhe Shkencave Humane, POLITEIA.

Të gjithë pjesëmarrësit në Konferencë do të pajisen me çertifikatë pjesëmarrjeje.

 

Dokumenta bashkëngjitur