Ndërkombëtarizimi

Universiteti Mesdhetar i Shqipërisë, Qendra Abdulaziz Saud Albatain për Gjuhën dhe Kulturën Arabe organizoi, me rastin e 18 dhjetorit, Ditës Botërore të Gjuhës Arabe, një tryezë të rrumbullaktë me Shkrimtarin dhe Profesorin Ylljet Alickaj. Aktiviteti u organizua në bibliotekën e UMSH. Ylljet Alickaj është shkrimtari shqiptar më i përkthyer në arabisht aktualisht, i cili ka marrë pjesë në Panairin Ndërkombëtar të Librit të  Kajros dhe të Riadit gjithashtu.

Në fjalën e hapjes, Drejtori i Qendrës Abdulaziz Saud Albatain për Gjuhën dhe Kulturën Arabe, Profesor Arben Cici foli për këtë datë historike, duke evidentuar rëndësinë e ruajtjes dhe përhapjes së gjuhës arabe dhe rolin e saj në Shqipëri si urë e bashkëpunimit të kulturës, traditës dhe miqësisë mes trashëgimisë shqiptare dhe asaj arabe. Ky rol nënvizoi ai është vlerësuar nga OKB, UNESCO, dhe organizata të tjera vecanërisht në ditët e sotme kur popujt dhe shoqëritë kanë nevojë të shkëmbejnë vlera dhe histori përbashkuese.

Në përshëndetjen e tij, Rektori i UMSH, Prof. Dr. Adrian Civici nënvizoi rolin e Qendrës Abdulaziz Saud Albatain për Gjuhën dhe Kulturën Arabe në UMSh, vecanërisht kursin e mësimit të gjuhës arabe si dhe aktivitetet që organizohen në këtë kuadër. Gjuha arabë, nënvizoi ai mbetet jo vetëm një pjesë e historisë por edhe projekt i së ardhmes së një bote më të qetë, më bashkëvepruese e ndërvepruese mes kombeve dhe popujve.

Në fjalën e tij, shkrimtari dhe profesori Ylljet Alicka, përshkroi mbresat dhe kujtimet e jashtëzakonshme nga vizitat e tij në dy Panairet Ndërkombëtare të librit, Kajro dhe Riad, si dhe mikëpritjen, vlerësimin e librave të tij nga mediat arabe dhe lexuesit gjithashtu. Shkrimtari Alicka, në përshtypjet e tij, nënvizoi faktin e lashtësisë, shtrirjes dhe pasurisë së gjuhës arabe si dhe trashëgimisë së saj, jo vetëm në vendet arabe por në mbarë botën. Pjesëmarrja e madhe e shkrimtarëve botërorë me emër në panairet e librit të vendeve arabe është një provë e kësaj pasurie të vyer arabe dhe botërore, përfundoi ai.

Fjala e shkrimtarit Alickaj në u ndoq me shumë interes dhe u shoqërua me pyetje dhe komente të shumta nga pedagogët dhe studentët që morrën pjesë në këtë aktivitet, vecanërisht studentët e kursit të gjuhës dhe kulturës arabe.

Në fjalën mbyllëse Profesor Cici, pasi falenderoi të pranishmit, nënvizoi edhe një herë vendosmërinë e përkushtimin për ta ruajtur dhe përhapur gjuhën dhe kulurën arabe në Universitetin Mesdhetar të Shqipërisë falë aktivitetit të dendur të Qendrës Abdulaziz Saud Albabtain për “Gjuhën dhe Kulturën Arabe” si dhe mbështetjes të vyer të Fondacionit Kulturor Abdulaziz Saud Albabtain në dobi të studentëve dhe pedagogëve të UMSh dhe jo vetëm.

Në mbyllje të aktivitetit, pedagogu i gjuhës arabe, Fatbardh Shega lexoi pjesë nga përkthimet në arabisht të veprës së shkrimtarit Ylljet Alicka.