Të Reja

Promovimi në Universitetin Haxhi Zeka ne Pejë i dy librave nga Presidenti i UMSH, Akademik, Prof.Dr.Anastas Angjeli dhe Rektori i UMSH, Prof.Dr.Adrian Civici.

Në ambientet e Fakultetit të Biznesit të Universitetit “Haxhi Zeka” në Pejë u mbajt promovimi i librave më të rinj të Akademik Anastas Angjeli dhe Akademik Adrian Civici. Prof. Dr. Anastas Angjeli prezantoi veprën e tij “Institucionet e Bretton Woods dhe Shqipëria”, një analizë të thelluar mbi arkitekturën financiare ndërkombëtare dhe ndikimin e saj historik e bashkëkohor në zhvillimin ekonomik të vendit. Ndërsa Prof. Dr. Adrian Civici promovoi librin “Sekretet e Gjenive të Biznesit”, vëllimi I dhe II, ku trajtohen modele suksesi, praktika inspiruese dhe përvoja të biznesit modern.  

Eventi mblodhi së bashku personelin akademik të Fakultetit të Biznesit të Universitetit Haxhi Zeka, studentë dhe të ftuar të shumtë, duke krijuar një atmosferë të pasur reflektimi, dialogu dhe shkëmbimi profesional. Në shenjë mbështetjeje dhe përkushtimi ndaj edukimit universitar, të dy autorët dhuruan librat e tyre për Bibliotekën e Universitetit “Haxhi Zeka”.

Në fjalën e tij, Rektori i Universitetit Haxhi Zeka, Prof.Dr. Armand Krasniqi mbasi vlerësoi bashkëpunimin ndërmjet UMSH dhe Universitetit Haxhi Zeka, u shpreh se këto dy botime të Profesorëve Angjeli dhe Civici, përfaqësojnë kontribute të vyera në literaturën ekonomike dhe në fushën e politikave zhvillimore, duke theksuar gjithashtu edhe rëndësinë që analizat e tyre kanë për kuptimin e saktë të dinamikave ekonomike shqiptare, rajonale dhe globale. Universiteti “Haxhi Zeka” mbetet i përkushtuar të promovojë autorët shqiptarë, të nxisë kulturën e librit dhe të forcojë lidhjen e komunitetit akademik me zhvillimet bashkëkohore në ekonomi, shkencë dhe shoqëri.