Të Reja

Universiteti Mesdhetar i Shqipërisë zhvilloi sot ceremoninë e promovimit të veprës së poetit dhe filozofit të madh azerbajxhanas Nizami Ganjavi. Ky aktivitet u zhvillua  me pjesëmarrjen e Presidentit të Universitetit, Anastas Angjeli, Ambasadorit të Republikës së Azerbajxhanit në Tiranë, Anar Huseynov, si dhe përkthyesit të veprës, Prof. Assoc ,Arben Cici, së bashku me pedagogë, studiues dhe studentë.

Në fjalën e tij përshëndetëse, Akademik Prof. Dr. Anastas Angjeli e cilësoi këtë botim si një moment të rëndësishëm të diplomacisë kulturore mes Shqipërisë dhe Azerbajxhanit. “Përurimi i kësaj vepre është një hap konkret drejt forcimit të urave akademike dhe kulturore mes dy vendeve tona”, u shpreh ai, duke theksuar se universitetet janë hapësira natyrore të dialogut, kërkimit shkencor dhe bashkëpunimit ndërkombëtar. Ai nënvizoi gatishmërinë për thellimin e partneritetit me institucionet akademike të Azerbajxhanit përmes projekteve të përbashkëta dhe shkëmbimeve studentore.

Ambasadori Anar Huseynov theksoi se këtë vit shënohet 885-vjetori i lindjes së Nizami Ganjavit, një prej figurave më të ndritura të letërsisë klasike të Lindjes. Ai vlerësoi faktin që veprat e poetit janë përkthyer në shumë gjuhë të botës dhe mbeten aktuale për mesazhet e tyre mbi drejtësinë, humanizmin dhe dijen. “Promovimi i kësaj vepre në gjuhën shqipe është një dëshmi e miqësisë dhe respektit të ndërsjellë mes popujve tanë”, u shpreh ai, duke falënderuar Universitetin Mesdhetar për organizimin e aktivitetit dhe përkushtimin në forcimin e dialogut kulturor.

Në përmbyllje, Prof. Assoc, Arben Cici ndau reflektime mbi sfidën e përkthimit të një autori me thellësi të jashtëzakonshme filozofike dhe poetike. “Ne sot nuk përurojmë thjesht një libër, por një urë midis gjuhëve, kulturave dhe shekujve”, theksoi ai, duke shtuar se vepra e Nizamit “është pjesë e ndërgjegjes së qytetërimit” dhe se përkthimi përbën një dialog të kujdesshëm me autorin për të ruajtur frymën dhe muzikën e vargut në shqip.

Aktiviteti u shndërrua në një moment domethënës reflektimi mbi rolin e kulturës dhe letërsisë si ura të qëndrueshme miqësie, duke rikonfirmuar angazhimin e Universitetit Mesdhetar të Shqipërisë për të promovuar dijen, bashkëpunimin dhe dialogun ndërkombëtar.