Të Reja

Universiteti Mesdhetar i Shqipërisë ka nënshkruar një marrëveshje bashkëpunimi me Agjencinë e Rinisë dhe Mirëqenies Sociale, Bashkia Tiranë, me fokus pajisjen e studentëve me Kartën e Studentit dhe zgjerimin e aksesit të tyre në shërbime dhe përfitime me tarifa të reduktuara.

Marrëveshja e bashkëpunimit u nënshkrua nga Drejtoresha e Përgjithshme e Agjencisë së Rinisë dhe Mirëqenies Sociale, Matilda Zizolli dhe Administratori i Universitetit Mesdhetar, Ilir Hebovija.
Marrëveshja synon të lehtësojë dhe përmirësojë jetën studentore përmes pajisjes së studentëve të Universitetit Mesdhetar të Shqipërisë me Kartën e Studentit, dokument i cili u jep mundësi të përfitojnë shërbime publike dhe private me çmime të reduktuara apo falas në kuadër të programit kombëtar të mbështetjes për studentët.

Në bazë të kësaj marrëveshjeje, Universiteti Mesdhetar i Shqipërisë do të vërë në dispozicion të Agjencisë ambientet dhe listat përkatëse të studentëve për realizimin e procesit të aplikimit dhe shpërndarjes së kartave, duke garantuar një proces të organizuar dhe të aksesueshëm për të gjithë studentët.

Studentët e pajisur me Kartën e Studentit do të kenë mundësi të përfitojnë ulje dhe lehtësi në shërbime të ndryshme publike dhe private gjatë gjithë periudhës së studimeve, duke krijuar më shumë mbështetje sociale dhe ekonomike për komunitetin studentor.

Universiteti Mesdhetar i Shqipërisë vijon të mbetet i angazhuar në krijimin e mundësive konkrete për studentët e tij, jo vetëm në aspektin akademik, por edhe në përmirësimin e përvojës studentore dhe mirëqenies sociale.