Ndërkombëtarizimi

Universiteti Mesdhetar i Shqipërisë fton stafin akademik të Fakultetit të Shkencave Humane të shprehë interesin për pjesëmarrje në Kongresin Ndërkombëtar “Catholics and the Civilization of Love”, organizuar nga universiteti partner University of Social and Media Culture in Toruń (AKSiM), Poloni, i cili do të zhvillohet më 27–28 nëntor 2026, në Toruń, Poloni.

Kongresi i këtij viti do të fokusohet në konceptin e “Civilization of Love”, duke trajtuar çështje që lidhen me dinjitetin njerëzor, etikën, drejtësinë, solidaritetin dhe sfidat bashkëkohore shoqërore e teknologjike.

Mundësitë e pjesëmarrjes

Pjesëmarrja në Kongres mund të realizohet fizikisht në Toruń ose në distancë.

Për stafin që nuk ka mundësi të udhëtojë drejt Polonisë, organizatorët ofrojnë mundësinë e pjesëmarrjes online, përmes regjistrimit paraprak të prezantimit, i cili do t’u dërgohet organizatorëve dhe do të prezantohet gjatë Kongresit.

Tarifa e pjesëmarrjes në Kongres: 0 EUR.

Ekziston gjithashtu mundësia e pjesëmarrjes fizike të financuar në kuadër të programit Erasmus+, në varësi të kuotave të mobilitetit të vendosura në dispozicion nga universiteti pritës. Për t’u konsideruar për financim në kuadër të Erasmus+, punimi duhet të jetë individual.

Kongresi do të transmetohet gjithashtu nga kanali televiziv kombëtar TV TRWAM, duke ofruar mundësi për një shtrirje më të gjerë të prezantimeve dhe diskutimeve akademike.

Mundësi për publikim

Pas përfundimit të Kongresit, organizatorët planifikojnë të mbledhin artikuj shkencorë të lidhur me temat e prezantuara për botim në një vëllim shkencor nga AKSiM. Shtëpia botuese e Akademisë është e përfshirë në listën e botuesve shkencorë të njohur nga Ministria Polake e Shkencës dhe Arsimit të Lartë.

Shprehja e interesit

Stafi akademik i interesuar për pjesëmarrje fizikisht dhe/ose online në Kongres dhe për paraqitjen e një punimi shkencor ftohet të shprehë interesin pranë: Zyrës së Marrëdhënieve me Jashtë, Erasmus+ dhe Projekteve [email protected] 

Afati për shprehjen e interesit: 25 shtator 2026

Informacioni i mëtejshëm do t’iu komunikohet në vijim, pas vendosjes në dispozicion të informacionit përkatës nga institucioni organizator.

Ju ftojmë të shfrytëzoni këtë mundësi për zhvillim dhe shkëmbim akademik ndërkombëtar, prezantimin e kërkimit shkencor, krijimin e bashkëpunimeve të reja dhe përfaqësimin e Universitetit Mesdhetar të Shqipërisë në një aktivitet ndërkombëtar akademik.